Pas javësh të tëra pritjeje dhe paqartësish, duket se procesit të shpalljes së rezultateve të zgjedhjeve të parakohshme po i vjen fundi. Komisioni Qendror i Zgjedhjeve (KQZ) ka bërë të ditur se rinumërimi i plotë i të gjitha vendvotimeve në vend pritet të përmbyllet gjatë javës së ardhshme, duke hapur rrugën për shpalljen e rezultateve përfundimtare të zgjedhjeve të 28 dhjetorit 2025.
Sipas KQZ-së, procesi i rinumërimit, i cili ka nisur më 13 janar, përfshin gjithsej 2,557 vendvotime në të gjithë territorin e Kosovës. Zëdhënësi i këtij institucioni, Valmir Elezi, ka theksuar se po bëhen përpjekje maksimale që ky proces të përfundojë sa më shpejt, në mënyrë që të mbyllet një nga fazat më të ndjeshme të procesit zgjedhor.
“Komisioni Qendror i Zgjedhjeve është duke u përpjekur maksimalisht që të përmbyllë në një kohë sa më të shpejtë rinumërimin e të gjitha vendvotimeve të mbetura, në mënyrë që të procedojë me shpalljen e rezultatit përfundimtar të zgjedhjeve të parakohshme për Kuvendin e Kosovës. KQZ planifikon që procesi i rinumërimit të të gjitha vendvotimeve të përmbyllet gjatë javës në vazhdim”, ka deklaruar Elezi.
Ai ka sqaruar se, edhe pse rinumërimi ndihmon në sqarimin e dilemave rreth rezultateve dhe mund të zvogëlojë numrin e ankesave, subjektet politike dhe kandidatët kanë të drejtë ligjore që të parashtrojnë ankesa. Për këtë arsye, KQZ do të presë përfundimin e afateve ligjore dhe shqyrtimin e eventualeve ankesave nga Paneli Zgjedhor për Ankesa dhe Parashtresa (PZAP), e më pas edhe nga Gjykata Supreme, nëse ka raste të tilla.
“Pas përfundimit të rinumërimit, KQZ do të shpallë rezultatin përfundimtar të zgjedhjeve. Subjektet politike dhe kandidatët do të kenë të drejtë ankese, ashtu siç parashihet me Ligjin për Zgjedhjet e Përgjithshme. Edhe pse rinumërimi i heq dilemat për saktësinë e rezultateve, KQZ duhet të respektojë afatet ligjore për ankesa para se të certifikojë rezultatin dhe të përmbyllë procesin zgjedhor”, ka shtuar Elezi.
Javën e ardhshme, më 28 janar, bëhet plot një muaj nga mbajtja e zgjedhjeve të parakohshme, ndërkohë që qytetarët ende presin rezultatin zyrtar përbërjen e re të Kuvendit të Kosovës. Fillimisht, KQZ kishte planifikuar shpalljen e rezultateve deri më 19 janar, por vendimi për rinumërim e shtyu këtë afat.
Rinumërimi u vendos pasi verifikimet në 33 vendvotime treguan mospërputhje mes votave të numëruara në Qendrat Komunale të Numërimit dhe atyre të evidentuara në fletëvotime. Për këtë arsye, KQZ ka bërë të qartë se rezultati që do të shpallet si përfundimtar do të bazohet në të dhënat e dala nga procesi i rinumërimit në Qendrën e Numërimit dhe Rezultateve (QNR), e jo në numërimet fillestare komunale.
Me përfundimin e këtij procesi, pritet që të qartësohet panorama politike dhe të hapet rruga për hapat e radhës institucionalë në Kosovë, pas një procesi zgjedhor që u shoqërua me vonesa dhe debat publik.
