Policia e Kosovës ka zbuluar një arsenal të tërë armësh dhe mjetesh shpërthyese gjatë një operacioni të zhvilluar në një shtëpi të braktisur në fshatin Joshevik të komunës së Zveçanit, duke ngritur shqetësime serioze për sigurinë në këtë zonë.
Sipas njoftimit zyrtar të Policisë, operacioni është realizuar rreth orës 09:20, pas pranimit të informatave përmes rrugëve operative. Gjatë kontrollit të objektit të braktisur, njësitë policore kanë gjetur dhe konfiskuar një sasi të konsiderueshme armësh dhe municionesh, të cilat dyshohet se ishin të destinuara për përdorim të paligjshëm.
Në mesin e materialeve të sekuestruara janë: një armë automatike e tipit AK-47, një pushkë gjysmë automatike dytytëshe, 10 karikatorë të zbrazët, 6 karikatorë të mbushur me nga 30 fishekë, 84 fishekë për armë automatike, 14 fishekë për pushkë gjysmë automatike, një rrip për fishekë, dy granata dore të tipit M50, si dhe pajisje për pastrimin dhe mirëmbajtjen e armëve.
Pas zbulimit të arsenalit, për rastin është njoftuar Prokurori i Shtetit, i cili ka udhëzuar inicimin e procedurës penale për veprën “Mbajtje në pronësi, kontroll ose posedim i paautorizuar i armëve”. Policia ka bërë të ditur se deri në këtë fazë të hetimeve nuk ka persona të arrestuar, ndërsa puna hetimore po vazhdon për të identifikuar personat përgjegjës dhe rrethanat se si këto armë kanë përfunduar në atë lokacion.
Ky rast vjen në një kohë kur çështja e sigurisë në veriun e Kosovës mbetet temë e ndjeshme, ndërsa autoritetet vazhdojnë përpjekjet për parandalimin e aktiviteteve të paligjshme dhe garantimin e rendit dhe ligjit në të gjithë territorin e vendit.
Policia e Kosovës ka falënderuar qytetarët për bashkëpunimin dhe ka bërë thirrje që çdo rast i dyshimtë apo veprim i kundërligjshëm të raportohet menjëherë në numrin emergjent 192 ose në stacionin më të afërt policor. Sipas Policisë, vetëm përmes bashkëpunimit të ndërsjellë me qytetarët mund të parandalohet rreziku dhe të sigurohet një mjedis i qetë dhe i sigurt për të gjithë.
Policia gjen armë, municion dhe granata dore në një shtëpi të braktisur në Zveçan
Mitrovicë Veri, 24.01.2026
Më datë 24.01.2026, rreth orës 09:20, Policia e Kosovës, pas pranimit të informatave përmes rrugëve operative, në fshatin Joshevik, komuna e Zveçanit, gjatë kontrollit të një shtëpie të braktisur ka gjetur dhe sekuestruar:
· 1 armë automatike AK-47
· 1 pushkë gjysmë automatike dy tytëshe
· 10 karikatorë të zbrazët
· 6 karikatorë të mbushur me nga 30 fishekë
· 84 copë fishekë për pushkë automatike
· 14 copë fishekë për pushkë gjysmë automatike
· 1 rrip për fishekë
· 2 granata dore M50
· Si dhe pajisje për pastrimin e armëve
Lidhur me rastin është njoftuar Prokurori i Shtetit, i cili ka udhëzuar inicimin e rastit për veprën penale “Mbajtje në pronësi, kontroll ose posedim të paautorizuar të armëve”.
Deri në këtë fazë të hetimeve nuk ka persona të arrestuar në lidhje me këtë rast.
Policia e Kosovës falënderon qytetarët për bashkëpunimin dhe ndihmën e vazhdueshme, si dhe i inkurajon që çdo rast të dyshimtë apo veprim të kundërligjshëm ta raportojnë në numrin emergjent 192 ose në stacionin më të afërt policor. Vetëm përmes bashkëpunimit të ndërsjellë mund të sigurojmë një ambient më të sigurt për të gjithë qytetarët, pa dallim.
