Presidenti ukrainas Volodymyr Zelensky ka bërë publik një draft të ri të planit të paqes për përfundimin e luftës me Rusinë, i hartuar pas disa javësh negociata intensive mes Kievit dhe Uashingtonit. Dokumenti i ri përmban 20 pika dhe zëvendëson planin e mëparshëm me 28 pika, i cili sipas Zelenskyt e vendoste Ukrainën në pozicion të pafavorshëm.
Plani i rishikuar u prezantua më 23 dhjetor dhe shoqërohet nga dy dokumente të tjera: një draft për garanci sigurie trepalëshe mes Ukrainës, SHBA-ve dhe vendeve evropiane, si dhe një marrëveshje bilaterale sigurie mes Kievit dhe Uashingtonit. Një dokument i veçantë fokusohet gjithashtu në bashkëpunimin ekonomik dhe rindërtimin e Ukrainës pas luftës.
Sipas Zelenskyt, palët kanë shënuar përparim të konsiderueshëm drejt finalizimit të dokumenteve, ndërsa SHBA pritet t’ia paraqesë draftin Rusisë më 24 dhjetor. Nëse palët bien dakord, marrëveshja përfundimtare do të kërkojë nënshkrimin e liderëve të Ukrainës, SHBA-ve, përfaqësuesve evropianë dhe Rusisë, duke hapur rrugën për një armëpushim të menjëhershëm.
Drafti i paqes parashikon njohjen e sovranitetit të Ukrainës, garanci të forta sigurie, ruajtjen e një ushtrie të fuqishme ukrainase, integrimin e vendit në Bashkimin Evropian dhe akses preferencial në tregun evropian. Po ashtu, dokumenti përfshin fonde masive për rindërtimin dhe rimëkëmbjen ekonomike, me synimin për të mobilizuar qindra miliardë dollarë investime.
Megjithatë, mbeten ende të hapura disa çështje kyçe, përfshirë kontrollin mbi Centralin Bërthamor të Zaporizhias dhe statusin e rajoneve lindore të Ukrainës, të goditura rëndë nga lufta. Drafti nuk përmend gjithashtu anëtarësimin e Ukrainës në NATO, një temë e ndjeshme në negociata.
Sipas planit, marrëveshja do të hyjë në fuqi pas ratifikimit nga parlamenti ukrainas ose miratimit përmes një referendumi kombëtar, i cili mund të zhvillohet brenda 60 ditëve nga nënshkrimi. Armëpushimi parashikohet të zbatohet menjëherë pas miratimit nga të gjitha palët.
