Presidentja e Kosovës, Vjosa Osmani ka kujtuar përvjetorin e masakrës së Rezallës ku forcat e regjimit gjenocid serb kryen një nga mizoritë më të rënda të luftës në Kosovë.
E para e vendit ka thënë se masakra e Rezallës ishte pjesë e një plani sistematik të shtetit serb për shfarosje.
Presidentja e ritheksoi edhe njëherë se nuk do të ndalet së kërkuari drejtësi.
“Më 5 prill 1999, në fshatin Rezallë të Drenicës, forcat e regjimit gjenocidal serb kryen një nga mizoritë më të rënda të luftës në Kosovë. Të rrethuar në shtëpitë e tyre, 98 djem e burra – banorë të Rezallës dhe të fshatrave përreth, u ekzekutuan në mënyrë çnjerëzore. Vrasja sikur nuk ju mjaftoi, ndaj zhdukën trupat e 44 prej viktimave, një akt tjetër i errët që synonte fshirjen e gjurmëve të gjenocidit. Disa prej këtyre trupave u gjetën vite më vonë në varrezat masive në Rudnicë të Rashkës, në territorin e Serbisë. Masakra e Rezallës ishte pjesë e një plani sistematik të shtetit serb për *shfarosje* , duke dëbuar me dhunë shqiptarët nga toka e tyre, nëpërmjet përndjekjes, vrasjeve masive, dhunimeve, djegieve dhe shkatërrimit.Ne nuk do të ndalemi së kërkuari drejtësi, sikurse as duke i kujtuar dhe nderuar përheherë”, ka shkruar Osmani.
