Në një prani që maksimumin e dukshëm mund të kapte deri në treqind pjesëmarrës, Vetëvendosja në Gjakovë e gjeti vetëm para jo shumë veshëve për t’u dëgjuar.
E quajtur si “nga zotimet tek (korrigjim: te) progresi”, Kryeministri i Kosovës, Albin Kurti, para aq audience sa kishte, foli se si me të ardhë në qeverisje vendin e ka gjetur “në gjendje të rëndë”.
Por, u tha ai të pranishmëve, “kthehemi sot një javë” për të nisur zyrtarisht fushatën zgjedhore për zgjedhjet parlamentare të 9 shkurtit.
“Sot një javë ne kthehemi këtu, andaj nuk mund të na lironi kollaj. Fushata e nisim pikërisht prej juve e me juve, për krjet Kosovën. Kjo ka qenë, një përmbledhje e të arriturave dhe punëve të kryera. Herën e ardhshme vimë me zotimet e premtimet, planet për projektet për 4 vjeçarin e ardhshëm”, tha Kurti.
Çfarë përmbledhje bëri?
Foli për shtesat për lehona dhe si kjo ka sjellë “për herë të parë në jetën e tyre” të hapin xhirollogari bankare…
Ndërkaq për vendin foli se si ishte, sipas tij, para një rënie dhe se me të ardhë ai vet në qeverisje, ia ka ndërruar trajektoren.
“E gjetëm vendin në një situatë të rëndë. Së pari nuk kishte as vaksina as kontrata për vaksina, së dyti ekonomia ishte tkurrur, papunësia ishte rritur, dhe kishim nivele të ulëta të prodhimit e të larta të korrupsionit. Imazhi i shtetit ishte ai qytetarëve që migrojnë e i pushtetarëve që pasurohen”, tha ai.
“Janë panumër akterë, faktorë, mekanizma, institucione që na kanë sjellur në pikën ku ndjehemi krenar që rritja ekonomike mesatare ishte 6% e BPV nga 2021 deri tash”, tha Albin Kurti.
Para asaj audience maksimalisht treqind personëshe kishte edhe qeveritarë të vet: si Ejup Maqedoncin dhe Hekuran Muratin.
Maqedonci, tash kandidat për deputetë të Vetëvendosjes, provoi t’u tregonte gjakovarëve se çka ka ngjarë “për herë të parë” në qytetin e tyre si pasojë e politikave të qeverisjes.
“Për herë të parë”, tha Maqedonci, dronët Bayraktar “u ngritën mbi qiellën e Gjakovës”.
“Dyfishimi i numrit të ushtarëve, katërfishimi i trajnimeve i ushtarakëve jashtë vendit, shumëfishimi i blerjeve të armatimit, dhe zgjerimi i infrastrukturës luftarake në zona të reja, ka ndikur dhe po ndikon në fuqizimin e ushtrisë tonë”, tha ai.
Këtu Maqedonci bëri përdredhimin e zakonshëm të pushtetit, duke krahasuar blerjet ushtarake në vitet 2018 dhe 2020 – ndonëse FSK ishte bërë ushtri vetëm 2018 dhe gjer atëherë s’kishte leje të blente armatime, por vetëm pasi bëhet ushtri.
“Gjatë qeverisjes prej vitit 2018-2020 janë investuar vetëm 4 milionë euro në blerjet ushtarake, pra investimet në sisteme të armatimit, por vetëm gjatë mandatit tonë qeverisës janë inestuar 319 milionë euro armatim”, tha Maqedonci.
Albin Kurti në një përmbledhje të këtij tubimi lajmëroi se në Gjakovë do të kthehen për të nisur zyrtarisht fushatën.
“E nisëm me qytetin historik, qendrën politike e kulturore që ka dhënë kaq shumë për çlirimin e pavarësinë, zhvillimin ekonomik dhe shtetndërtimin demokratik”, tha ai.
