Etnik Brruti po lë gjurmë që në sezonin e tij të parë te Hajduku i Splitit.
Mesfushori 22-vjeçar realizoi golin e tij të parë me fanellën e klubit kroat në fitoren bindëse 4-0 ndaj Osijekut, në kuadër të javës së katërt të elitës së futbollit kroat.
Ndeshja ndaj Osijekut ishte edhe e para për Brrutin si titullar te Hajduku dhe ai e shfrytëzoi në mënyrën më të mirë mundësinë e dhënë.
Ai u tregua i saktë brenda zonës pas një pasimi diagonal drejt qendrës dhe, pasi fitoi hapësirën e nevojshme ndaj mbrojtësve kundërshtarë, me një goditje të fuqishme e dërgoi topin në rrjetë.
Përveç golit, Brruti zhvilloi një paraqitje të shkëlqyer, duke u vlerësuar me notën 8.1 nga Sofascore.
Performanca e tij i siguroi edhe një vend në formacionin e javës së katërt në elitën e futbollit kroat.
Brruti iu bashkua Hajdukut këtë verë, pas transferimit nga Malisheva, ku ishte ndër futbollistët më të spikatur në vitet e fundit dhe një prej talenteve më premtuese të futbollit kosovar.
Ai kishte qenë pjesë edhe e Përfaqësueses U21 të Kosovës, ndërsa më pas zgjodhi të përfaqësojë Shqipërinë dhe tashmë është pjesë e grupmoshave të Kombëtares kuqezi.