Haxhiu: Qeverisë Kurti e vetmja armë që i ka mbetur është propaganda dhe mashtrimi

Deputeti i PDK-së, Bekim Haxhiu ka thënë se e vetmja armë që i ka mbetur kësaj Qeverie është propaganda dhe mashtrimi.

Ai tha se Kosova është çliruar e gjitha në 1999-tën dhe vendi nuk mund të çlirohet dy herë, që sipas tij janë duke pretenduar Qeveria Kurti për veriun e vendit.

Tutje, Haxhiu ka thënë se asnjë nga premtimet që kjo Qeveri i kishte në programin qeverisës nuk arriti t’i realizojë për pesë vite sa kemi Qeverinë Kurti 1 dhe 2.

“E vetmja armë që i ka mbetur kësaj Qeveri është propaganda dhe mashtrimi dhe jorezulltatet konkrete. Kosova është çliruar në vitin 1999 dhe përgjegjës për sigurinë në Kosovë janë KFOR-i të ndihmuara nga institucionet tona të sigurisë: Policia dhe FSK-ja. Disa zhargone që kemi munduar me i dëgju që është çliruar veriu – Kosova në 1999-tën është çliruar e tëra dhe pikat kufitare 1 dhe 31 janë vendosur pas Pavarësisë së Kosovës…Kosova cep më cep qysh po thonë këta me këtë propagandën e tyre ka qenë e lirë dhe sovrane dhe nuk mundësh me bë dy herë çlirimin e një vendi, por që këta këtë zhargonin mashtrues po mundohen më bartë në një sferë tjetër, sepse në të gjitha sferat ku kanë premtuar kanë dështuar”, ka thënë ai në emisionin “Ditari” në Tëv1.

Haxhiu tha se qytetarët ia kanë dhënë para 4 vitesh një mundësi kësaj Qeverie, por e kanë parë që ka abuzuar me votën e tyre.