Forca e Sigurisë së Kosovës (FSK), ka njoftuar se Kadetët e Qendrës për Studime Universitare (QSU), kanë pranuar medaljen e artë nga Instituti Ndërkombëtar i Ligjit Humanitar (IIHL) në Sanremo të Italisë në garën ndërkombëtare të Ligjit të Konfliktit të Armatosur (LOAC) .
Pjesë e garës ndërkombëtare të Ligjit të Konfliktit të Armatosur (LOAC), kanë qenë akademi të ndryshme nga vende të botës dhe suksesi i arritur i kadetëve të QSU-së është vlerësuar lartë nga FSK-së.
Instituti Ndërkombëtar i Ligjit Humanitar (IIHL) është një organizatë e pavarur që promovon ligjin ndërkombëtar humanitar, të drejtat e njeriut dhe ligjin e refugjatëve, duke ofruar kurse dhe konferenca për profesionistë ushtarakë, diplomatë dhe juristë, thuhet në njoftimin e FSK-së.
Kadetët e QSU-së, morën pjesë për herë të parë në këtë garë ndërkombëtare dhe arritën të triumfojnë suksesshëm duke u shpërblyer me medaljen e artë.
“Qendra për Studime Universitare mori pjesë për herë të parë në këtë garë dhe u kthye me medalje të artë, duke dëshmuar avancimin që kjo qendër po arrin në përgatitjen e kadetëve të saj. Gara ishte gjithashtu një shembull i shkëlqyer i punës ekipore me kombet e tjera, ku kadetët tanë bashkëpunuan ngushtë me kolegë ndërkombëtarë në zbatimin e Ligjit të Konfliktit të Armatosur”- njofton FSK
