Kryetari i PDK-së, Memli Krasniqi, ka deklaruar se është takuar dy herë me homologun e tij nga LDK-ja, Lumir Abdixhikun.
Në Rubikon të Klan Kosovës, ai tha se mund të ketë edhe takime tjera me të, në funksion të diskutimit për qeverinë e opozitës.
“Me kryetarin e LDK-së, Lumir Abdixhiku, jemi takuar dy herë. Jam takuar edhe unë edhe zotëri Hamza, si mandatar, dhe besoj se do të ketë edhe takime tjera. Ka pasur takim… nuk janë takime të fshehta, sepse ndonjëherë bëhen më dramatike se që janë. Unë zotëri Abdixhikun ka vite që e njoh. Në kohën sa kemi qenë në opozitë edhe jemi koordinuar për veprime. Na kanë ndihmuar shumë kryetarët e grupeve parlamentare, për çka ua kam dhënë kreditin. Kur ka performuar opozita mirë në Kuvend, më shumë kanë merita Abelard Tahiri, Arben Gashi e Besnik Tahiri sesa Memli Krasniqi, Lumir Abdixhiku e Ramush Haradinaj”.
“E kam takuar zotëri Abdixhikun, e kam ftuar edhe pas zgjedhjeve, siç kam diskutuar edhe me të tjerët, dhe kemi pasur një takim shumë të mirë, por realisht qëndrimi i tij, i kuptueshëm, i thënë publikisht, ka qenë që po e presim certifikimin e rezultateve, por s’kemi mbërri të takohemi ende sepse certifikimi sapo ndodhi, ishte edhe festa e Bajramit. Tash që është përcaktuar seanca, unë besoj se do të kemi takime tjera. Iniciativa na takon neve, jemi parti më e madhe, na bie përgjegjësia. Ka ftesë (për takim tjetër me Abdixhikun). Por, mos e bëni dramatike. Presim të takohemi, por nëse ka diçka që na bashkon në këtë pjesë të qëndrimit, nuk dëshirojmë të ngarendim e të themi ‘e bonëm’. Jo zotëri Albin Kurti, të kanë votuar qytetarët më shumë se neve, Bujrum, bëje! Takimi i fundit me Abdixhikun mund t’i ketë dy javë”, deklaroi Memli Krasniqi.
