Profesori universitar Milazim Krasniqi ka komentuar krizën e marrëdhënieve mes Kosovës dhe SHBA-ve, pas deklaratës së Emisarit Richard Grenell i i cili tha se “ ShBA qe 35 vite kishte raporte të shkëlqyeshme me Rugovën, Thaçin dhe Hotin, vetëm me Kurtin raportet janë në krizë”, shkruan Gazeta Momenti.
Për profesor Krasniqin, ky është një problem i shkaktuar nga qeverisja e Albin Kurtit.
Sipas tij, kriza që ka lindur nga politikat e tij është e tillë që nuk mund të zgjidhet nga ai që e ka krijuar, duke iu referuar Kurtit.
Ai konsideron se qytetarët e Kosovës kanë një përgjegjësi të madhe dhe duhet të reagojnë në zgjedhjet e 9 shkurtit, duke e dërguar Kurtin në opozitë për të shpëtuar vendin nga pasojat e mëtejshme.
Krasniqi thekson se kjo krizë nuk është thjesht një çështje ideologjike, por një çështje që lidhet me ekzistencën dhe të ardhmen e Kosovës. Sipas tij, vendi nuk mund të përballojë katër vjet të tjera me tensione të tilla, sidomos me SHBA-në, aleatin më të fuqishëm të Kosovës.
Postimi i tij:
“Grenell:ShBA qe 35 vite kishte raporte të shkëlqyeshme me Rugovën, Thaçin dhe Hotin, vetëm me Kurtin raportet janë në krizë” (Nacionale, 5 janar 2025) Koment: Kjo krizë nuk zgjidhet nga ai që e ka shkaktuar. Qytetarët e Kosovës duhet ta zgjidhin krizën më 9 shkurt, duke çuar shkaktarin e krizës, pra Kurtin, në opozitë. Nuk është çështje ideologjike. Kosova nuk mund t’i mbijetojë edhe katër vite me krizë në raportet e saj me SHBA-në. Sidomos jo me SHBA-në e Trampit.
