Në një reagim publik, Bajrami ka thënë se gjendja reale në shëndetësi nuk mund të vlerësohet përmes konferencave për media apo shifrave të prezantuara nga institucionet, por duke parë përvojën e pacientëve në klinikat publike. ‘Pyetni të sëmurët.
Shkoni në Pediatri, në Gjinekologji, në Onkologji, në Ortopedi dhe shihni listat e pritjes, ku për shkak të dështimit të tenderëve për furnizim me material, pacientët presin me vite për një ndërhyrje,’ ka deklaruar Bajrami.
Ajo ka kërkuar që kritikat të mos drejtohen ndaj mjekëve dhe infermierëve, duke theksuar se ata punojnë në kushte të vështira. ‘Mos i fajësoni mjekët dhe infermierët.
Ata punojnë në kushte jashtëzakonisht të vështira dhe, pavarësisht gjithçkaje, vazhdojnë ta mbajnë në këmbë sistemin.
Përgjegjësia nuk është e tyre,’ ka thënë ajo.
Bajrami ka akuzuar qeverinë për dështim në menaxhimin e sektorit të shëndetësisë, duke përmendur edhe proceset e prokurimit publik si një nga problemet kryesore. ‘Pas gjashtë vjetësh me të gjitha nivelet e pushtetit në duar dhe me rreth 4 miliardë euro buxhet çdo vit, ta kesh shëndetësinë në këtë gjendje është turp,’ është shprehur deputetja e zgjedhur e LDK-së.
Sipas saj, problemet në shëndetësi lidhen me keqmenaxhim dhe korrupsion. ‘Gjendja në shëndetësi ka emër: emri i saj është korrupsion,’ ka deklaruar Bajrami.
Ajo ka ngritur shqetësime edhe për tenderët në institucionet shëndetësore, duke pretenduar se, pavarësisht kontratave milionëshe, në klinika vazhdojnë të mungojnë kushtet elementare. ‘Ka tenderë milionësh për pastrim, për çarçafë dhe për ushqim të pacientëve, ndërsa në klinika mungojnë edhe gjërat më elementare,’ ka thënë ajo.
Deputetja e zgjedhur ka përmendur edhe mungesën e barnave për pacientët me sëmundje të rënda, duke deklaruar se qytetarët shpesh detyrohen t’i blejnë vetë terapitë. ‘Ka dhjetëra miliona euro tenderë për barna, por barnat mungojnë.
Pacientëve u jepen udhëzime se ku dhe cilin brend duhet ta blejnë me paratë e veta,’ ka thënë Bajrami.
Në fund të reagimit të saj, Bajrami ka theksuar se përgjegjësinë për gjendjen aktuale e bart pushteti, duke e cilësuar situatën në shëndetësi si alarmante. ‘Kur dështon shëndetësia, nuk dështon vetëm qeveria, dështon shteti,’ ka përfunduar ajo.
Reagimi i Hykmete Bajramit vjen në kohën kur sistemi shëndetësor në Kosovë vazhdon të përballet me kritika për mungesën e furnizimeve, pritjet e gjata për trajtime dhe sfidat në menaxhimin e institucioneve publike shëndetësore.