Një histori tronditëse ka dalë në dritë përmes emisionit investigativ Kiks Kosova, duke zbuluar një skemë shqetësuese që përfshin vajza të reja të manipuluara dhe të keqpërdorura në emër të dashurisë dhe punësimit.
Në qendër të kësaj historie ndodhet Edis Shala, një emër që tashmë po përmendet gjerësisht për veprimet e tij të dyshimta. Ai dyshohet se ka manipuluar vajza të reja, duke i paraqitur si të dashurat e tij dhe më pas i ka futur në punë në një qendër masazhi në Prishtinë të quajtur “Magic Spa”. Një prej rasteve më shqetësuese është ai i B.M., një vajzë vetëm 17-vjeçare, e cila braktisi shkollën për të punuar në këtë qendër.
Sipas prindërve të saj, të cilët rrëfyen historinë për emisionin, vajza ishte regjistruar në shkollë për të ndjekur ëndrrën e saj për t’u bërë mjeke. Por gjithçka ndryshoi pasi ajo u njoh me Edis Shalën. Në vend të shkollës, ajo përfundoi në një ambient ku, përveç punës së dyshimtë, ajo dhe vajzat e tjera ekspozonin trupin e tyre në rrjetet sociale si Instagram.
Kur u përball me gazetarët e Kiks Kosova, Edis Shala u shfaq i ftohtë dhe i qetë, duke mohuar çdo akuzë. Ai pretendoi se vajza ishte mbi moshën madhore dhe u zotua se do të dërgonte letërnjoftimin e saj përmes WhatsApp-it – gjë që nuk ndodhi kurrë.