E shtuna nuk do të jetë ditë pushimi për deputetët e zgjedhur, që për herë të tretë do të tentojnë ta konstituojnë legjislaturën për të cilën u zgjodhën për të shërbyer. Kryeministri në detyr Albin Kurti sërish refuzoi të flasë për seancën që fillon në orën 12, ndërsa njohës të punës së Kuvendit vlerësojnë se zhbllokimi i situatës është në vullnetin e partive.
“Ajo është nesër, apo?!”
Me këtë pyetje u përgjigj kryeministri në detyrë Albin Kurti – i cili më 9 Shkurt fitoi më shumë se 337 mijë vota – kur u pyet për vazhdimin e seancës konstituive të legjislaturës së nëntë në Kuvendin e Kosovës dhe për numrat.
Raporti i komisionit të përkohshëm për verifikimin e kuorumit dhe të mandateve është pika në të cilën ka ngecur inaugurimi, që nga 15 Prilli.
Vazhdimi i dytë i seancës, mesditën e së shtunës, pas ndërprerjes së dytë 48-orëshe, parakusht për zhbllokim e ka lëvizjen nga pozicionet tashmë të kumtuara nga të gjitha partitë.
Neni 66 i Kushtetutës, si dhe rregullorja e Kuvendit, përmendin afatin prej 30 ditësh për mbajtjen e seancës konstituive, që konsiderohet e mbyllur vetëm pas zgjedhjes së kryetarit dhe nënkryetarëve.
Por, nuk ka qartësi për afatet kohore.
“Nuk tregohet, edhe me aktgjykim të Gjykatës Kushtetuese është thënë që mos-konstituimi i Kuvendit për çfarëdo kohe të caktuar që vendi të shkojë në zgjedhje ose të bëhen veprime të tjera. Pra i takon kryesuesit, partive politike të gjejnë modalitet se si ta konstituojnë Kuvendin”, ka thënë Naim Jakaj, Hulumtues i lartë në IKD.
Vetë Aktgjykimi i Gjykatës Kushtetuese nga viti 2014, që ishte nxjerrë 40 ditë nga nisja e seancës konstituive, kishte urdhëruar Kuvendin që “të përfundojë seancën konstituive duke zgjedhur kryetarin dhe nënkryetarët”.
Seanca konstituive e nisur më 17 Korrik ishte mbyllur 8 Dhjetor, 144 ditë pas nisjes, me zgjedhjen e kryetarit dhe pesë nënkryetarëve.
Në vlerësimin e Jakajt, edhe për zgjedhje të reja, parakusht është konstituimi.
“Në zgjedhje nuk mund të shkojmë pa u konstituuar Kuvendi i Kosovës. Një gjë të tillë duhet ta dinë edhe deputetët. E dinë ata. Por, këto janë veprime politike për të cilat përgjegjës do të jenë vetë partitë dhe humbëse vetëm Kosova” , ka thënë Naim Jakaj, Hulumtues i lartë në IKD.
Një ditë para seancës, nga Nisma Socialdemokrate – parti që ka fituar tri ulëse në Kuvend – nuk konfirmuan e as mohuan një marrëveshje eventuale me Lëvizjen Vetëvendosje për konstituim të Kuvendit dhe formim të Qeverisë.
Ndërkaq, AAK-ja paralajmëroi që, pas Adem Hoxhës, presin që grupit të tyre parlamentar t’i bashkohen edhe deputetë të tjerë nga radhët e komuniteteve jo-serbe.
Në mesin e zhvillimeve rreth tentimit të tretë për konstituim të Kuvendit, të paktën sot, nuk deshi të përfshihej presidentja Vjosa Osmani, pasi bëri homazhe në kompleksin e varrezave të dëshmorëve në Velani.
Letra që presidentja Osmani i ktheu kryesuesit të Seancës, Avni Dehari, nga ky i fundit u vlerësua se jep sqarime, por siç u shpreh, jo edhe zgjidhjen përfundimtare për situatën e krijuar.
