Ngushtica e Hormuzit, një rrugë e ngushtë detare vazhdon të jetë një nga pikat më strategjike në botën e energjisë dhe të naftës.
Sipas CNN, kjo ngushticë shërben si rruga kryesore për transportin e naftës nga vendet e pasura me naftë si Arabia Saudite dhe Kuvajti drejt tregjeve ndërkombëtare.
Ajo është konsideruar prej kohësh si një “nyje kritike e furnizimit me naftë” në nivel global, transmeton Klankosova.tv.
Sipas Administratës Amerikane për Informacionin e Energjisë (EIA), përmes kësaj ngushtice dikur kalonin rreth 20 milionë fuçi nafte në ditë, që përbëjnë afërsisht një të pestën e prodhimit global ditor.
Megjithatë, situata është përkeqësuar pas përshkallëzimit të konfliktit në rajon, kur Irani kufizoi ndjeshëm lëvizjen në këtë korridor detar pas sulmeve të ShBA-së më 28 shkurt.
Irani kontrollon pjesën veriore të ngushticës, duke rritur ndikimin e tij strategjik në këtë zonë.
Edhe pse disa vende prodhuese si Arabia Saudite dhe Emiratet e Bashkuara Arabe kanë gjetur rrugë alternative për eksportet e tyre, rreth 10 deri në 12 milionë fuçi naftë në ditë mbeten të kufizuara dhe të vështira për t’u dërguar në tregjet globale.
Përveç naftës, transmeton klankosova.tv, përmes ngushticës kalon edhe rreth një e pesta e tregtisë globale të gazit natyror të lëngshëm, kryesisht nga Katari, duke e bërë këtë rrugë detare edhe më të rëndësishme për ekonominë botërore.
Ekspertët paralajmërojnë se çdo përshkallëzim i mëtejshëm në këtë zonë mund të ketë ndikim të drejtpërdrejtë në çmimet globale të energjisë dhe stabilitetin e tregjeve ndërkombëtare. /Klankosova.tv
