Njëri prej themeluesve të Lëvizjes për Braktisjen Vullnetare të Fesë Islame është përfshirë në një skandal seksual.
Ragip Përgjegjaj, 56-vjeç, është arrestuar nga Policia e Kosovës të premten pasdite nën dyshimin për sulm seksual ndaj një të mituri, ka mësuar Paparaci nga burime brenda organeve të rendit.
Përgjegjaj, ishte një nga pjesëmarrësit e mbledhjes së parë themeluese të Lëvizjes për Braktisjen Vullnetare të Fesë Islame, të njohur ndryshe si Lëvizja e Deçanit, më 20 tetor të vitit 2023.
Ragip Përgjegjaj, pjesëmarrës në aktivititetin e parë të krijimit të Lëvizjes së Deçanit
Policia tha të shtunën se rasti për të cilin është arrestuar Përgjegjaj, ka ndodhur në Deçan.
“Është arrestuar i dyshuari mashkull kosovar, pasi që kishte sulmuar seksualisht viktimën mashkull kosovar (i mitur)”, tha policia në raportin 24-orësh të publikuar të shtunën.
I dyshuar për veprën penale “sulm seksual”, Përgjegjaj është ndaluar me urdhër të Prokurorit të Shtetit të premten.
Pas kërkesës së Prokurorisë Themelore në Pejë, i dyshuari është dërguar në paraburgim për 30 ditë, tha sot zëdhënësi i Prokurorisë, Sahkodran Nikçi.
Nikçi nuk përmendi iniciale, as emër, të të arrestuarit. Tha se në fazën aktuale të hetimeve dhe për shkak të “ndjeshmërisë së rastit” nuk mund të japë informacione për ngjarjen.
“Gjatë ditës se djeshme, është mbajtur seanca dëgjimore, ku prokurori i shtetit ka dhënë arsyet pse duhet aprovuar nga gjykata kërkesa për paraburgim të pandehurit”, tha zëdhënësi i Prokurorisë në Pejë. “Njëkohësisht ju njoftojmë që gjykata përkatëse ka aprovuar kërkesën e prokurori të shtetit, duke ja caktuar 30 ditë paraburgim të pandehurit”.
Dalja në publik e Lëvizjes së Deçanit në tetorin e 2023-s ngjalli sërë reagimesh për motivet e saj. Kryetari i Komunës së Deçanit, Bashkrim Ramosaj, u distancua nga organizimi dhe thirrjet e kësaj lëvizje.
Lidhja e Historianëve “Ali Hadri”, me bazë në Deçan, po ashtu dënoi formimin e Lëvizjes së Deçanit dhe tha se një iniciativë e tillë përbën thirrje për nxitje të urrejtjes dhe mosdurimit.
