Ish-drejtori i shërbimit sekret serb (BIA), Aleksandar Vulin, ka bërë deklarata të ashpra dhe kërcënuese ndaj Kosovës dhe kryeministrit Albin Kurti, duke nxitur reagime dhe shqetësime në opinionin publik. Në një paraqitje në mediat serbe, Vulin ka bërë thirrje që Serbia të ndjekë, sipas tij, modelin e Izraelit dhe të shërbimit të tij sekret Mossad në trajtimin e personave që ai i cilëson si kundërshtarë të interesave serbe.
Gjatë intervistës, Vulin theksoi se shteti serb duhet të hartojë plane konkrete për t’u përballur me individë që, sipas tij, janë bartës të politikave që ai i quan “antiserbe”. Ai pretendoi se institucionet e sigurisë së Serbisë kanë kapacitetet për të ndërmarrë veprime të tilla dhe se duhet të veprojnë më vendosmërisht.
“Shteti serb duhet të veprojë. Pas kësaj, unë do të kërkoja nga shërbimet tona të krijojnë një plan të qartë se si do të merremi me individë me emër dhe mbiemër, të cilët janë bartës të politikave antiserbe. Ata le të mendojnë se çfarë mund t’u ndodhë”, ka deklaruar Vulin gjatë emisionit.
Ai ka shtuar më tej se Serbia duhet të ndjekë shembullin e Izraelit, duke përmendur në mënyrë të drejtpërdrejtë veprimet e shërbimit sekret izraelit Mossad ndaj atyre që konsiderohen kërcënim për sigurinë e shtetit izraelit.
“Mundet Izraeli, mundet Mossadi, pse s’mundet shërbimi serb, pse s’mundemi edhe ne?”, është shprehur ai, duke lënë të kuptohet se Serbia duhet të përdorë metoda më të ashpra ndaj kundërshtarëve politikë dhe figurave që ai i konsideron përgjegjëse për politika kundër interesave serbe.
Deklaratat e Vulinit vijnë në një periudhë të tensionuar në raportet ndërmjet Kosovës dhe Serbisë, ku retorika politike shpesh është shoqëruar me akuza dhe kundërakuza nga të dyja palët. Komentet e tij kanë nxitur debat në opinionin publik dhe në qarqet politike, pasi ato interpretohen nga shumë analistë si një formë presioni politik dhe retorikë e ashpër ndaj institucioneve të Kosovës.
Aleksandar Vulin, i cili aktualisht drejton Lëvizja Socialiste e Serbisë, ka qenë për vite me radhë një nga figurat më të zëshme në politikën serbe kur bëhet fjalë për Kosovën. Ai ka mbajtur më parë edhe poste të rëndësishme në qeverinë serbe, përfshirë atë të ministrit të Mbrojtjes dhe ministrit të Brendshëm, përpara se të emërohej në krye të Agjencisë së Sigurisë dhe Informacionit.
Deklaratat e tij për përdorimin e metodave të ngjashme me ato të Mossad-it ndaj kundërshtarëve kanë ngritur shqetësime për shkak të implikimeve të mundshme për sigurinë dhe stabilitetin në rajon, duke shtuar edhe më shumë tensionet politike në Ballkanin Perëndimor.
