Ish i akuzuari për ryshfet, deputeti Armend Muja u ka thënë disa simpatizantëve të Lëvizjes Vetëvendosje se synimi i partisë është vendosja nën kontroll e sistemit prokurorial dhe gjyqësor, në një komunikim me ta përmes një platforme online.
Në komunikimin të cilin e ka siguruar Paparaci, deputeti Muja ua kërkon atyra votat për Lëvizjen Vetëvendosje me premtimin se në mandatin pasues do të “kapet” Prokuroria dhe Gjyqësori.
“Dhe, kjo është arsyeja pse unë ende besoj që diku ku nuk kemi mundur të kemi ende kontroll ose diku ku 14 shkurti nuk ka arritur ende të depërtojë është te sistemi prokurorial dhe i drejtësisë, sepse kërkohet një vendim i gjykatës për të përjashtuar Lista Serbe nga procesi ynë politik”, dëgjihet duke thënë Muja, në komunikim me disa militantë të LVV-së.
Tutje, ai thotë se kapja e sistemit të drejtësisë është përgjegjësi e Vetëvendosjes për mandatin e ardhshëm.
“Atë po kemi vështirësi me kontrollu, sepse në krye të Prokurorisë është x personi i cili ia ka heq fletarrestin Radojçiqin. Dhe, kjo është përgjegjësia që ne e kemi. Për këtë arsye në mandatin që po pason do të pastrohet edhe sistemi i drejtësisë”, u thotë Muja, bashkëbiseduesve në komunikim.
Muja, i cili shërbeu për herë të parë si deputet në legjislaturën aktuale të Kuvendit të Kosovës, ishte akuzuar për ryshfet nga Prokuroria Speciale në vitin 2014.
Ai akuzohej për marrje të ryshfetit në vazhdim dhe bashkëkryerje.
Në të njëjtin rast akuzoheshin edhe Basri Muja e Ferdije Zhushi-Etemi, zyrtarë të Agjencisë Kosovare të Akreditimit, përkatësisht Këshillit Shtetëror të Cilësisë. Muja, asokohe shërbente si zyrtar në organizatën jo-qeveritare UNDP.
Në vitin 2019, Muja dhe të tjerët u liruan nga akuzat cili meqë vepra penale për të cilën akuzoheshin ishte vjetërsuar.
Armend Muja, më 21 janar 2021-s kishte aderuar në Lëvizjen Vetëvendosje
