Shkrimtari dhe albanologu i njohur, Rexhep Qosja, të hënën publikoi një shkrim në mbështetje të partisë në pushtet, Lëvizja Vetëvendosje, duke na treguar se edhe ai do ta votojë VV-në. Sidoqoftë, akademiku bëri disa gabime drejtshkrimore në shkrimin e tij.
Fillimisht, ai e përdori gabimisht e pa vend emrin “sajë” në vend të parafjalës “saje”.
Në fjalor, emri “sajë” përshkruhet si “mjet për të bartur njerëz e sende, i ndërtuar prej dy drurësh anësorë të lëmuar ose me një rrip hekuri nga poshtë dhe me një shtresë të mbërthyer përsipër, që tërhiqet zakonisht nga qentë a nga kuajt e rrëshqet mbi dëborë ose mbi tokë të rrafshët; lodër fëmijësh e ndërtuar në këtë trajtë, me të cilën rrëshqasin nga lart mbi dëborë, rrëshqitëse”.
Parafjala “saje” është fjala që përshtatet kuptimisht në fjalinë e shkrimtarit, sepse kuptimi i saj, sipas fjalorit, është “me anë të …, me ndihmën e…, për hir të …, falë …, si pasojë e …”.
“Kosova është bërë shtet i pavarur në sajë të luftës së drejtë, çlirimtare, të lavdishme dhe të Idealit shtetkrijues kombëtar të Ushtrisë Çlirimtare të Kosovës pa të cilën nuk do të mund të parashihej as prej intelektualit, politikanit a shtetarit më largpamës se edhe sa kohë, sa shekuj Kosova do të ishte e pushtuar prej Serbisë” – shkroi Qosja.
Më pas, shkrimtari e shkroi gabimisht edhe foljen “u cenua”, duke shkruar “u cënua” – “kur shpresa u cënua prej dëshpërimit”.
Për më tepër, akademiku bëri edhe një gabim elementar sa u përket shenjave të pikësimit, sepse nuk e përdori presjen para lidhëzës “sepse” në fjalitë e përbëra me pjesë të nënrenditur shkakore, si në fjalinë në vijim: “Do të votoj sepse më kanë nxitur para së gjithash dy të dhëna: […]”/Nacionale
