Dy të rinj nga Kosova humbën jetën të premten pasdite në një aksident tragjik në autostradën A4 drejt Trieste, ndërsa po udhëtonin me makinë, me shumë gjasa drejt kufirit me Slloveni. Përplasja ndodhi me një kamion që transportonte mallra, ku frenimi i papritur i mjetit të rëndë besohet të ketë qenë shkaku i incidentit fatal.
Raportet e mediave italiane tregojnë se aksidenti ishte jashtëzakonisht i fortë, duke bërë që makina e viktimave të shtypet nën rimorkion e kamionit. Dy të rinjtë humbën jetën pothuajse menjëherë në vendngjarje. Dukshmëria në zonë, e ndikuar nga mjegulla e mëngjesit, ishte përmirësuar pasdite, por kushtet mbetën të vështira për shkak të shpejtësisë së lartë të mjeteve.
Shtetasit kosovarë janë identifikuar si Fidan Peci, 27 vjeç, dhe Ardian Avdyli, 21 vjeç. Ata po udhëtonin me një Volkswagen Golf me targa polake. Pavarësisht ndërhyrjes së shpejtë të shërbimeve të emergjencës dhe ekipit mjekësor në vendngjarje, për fat të keq, asgjë nuk mund të bëhej për të shpëtuar jetën e tyre.
Ngjarja ka tronditur komunitetin kosovar në Itali dhe Mitrovicë, ndërsa autoritetet italiane kanë nisur hetimet për të sqaruar rrethanat e sakta të aksidentit dhe për të përcaktuar përgjegjësitë e mundshme.
