Kryeministri i Kosovës, Albin Kurti, është pyetur sot nga gazetarët nëse i ka ofruar presidentes së vendit, Vjosa Osmani, ndonjë pozitë ministrore dhe nëse i frikësohet fuqisë së saj politike në rast se ajo do të rikthehej në skenën partiake, qoftë në Lidhja Demokratike e Kosovës apo në ndonjë subjekt tjetër politik.
Megjithatë, Kurti nuk ka dhënë një përgjigje të drejtpërdrejtë lidhur me këto pyetje. Ai ka theksuar se gjatë viteve të fundit ka pasur shumë takime dhe diskutime me Osmanin, por ka nënvizuar se bisedat mes tyre janë konfidenciale dhe nuk mund të bëhen pjesë e debatit publik.
Sipas tij, marrëdhënia institucionale mes presidentes dhe kryeministrit kërkon respektim të rolit dhe përgjegjësive që secili mban në kuadër të institucioneve të shtetit.
“Ne jemi takuar me presidenten qindra herë në këto më shumë se pesë vite në situata të ndryshme. Kemi pasur diskutime të panumërta. E ruajmë transparencën e proceseve, por na duhet ta ruajmë edhe konfidencialitetin e bisedave. Ajo është kryetare e shtetit ku unë jam kryeministër. S’është koha që të bëj diskutime publike politike me presidenten e vendit”, ka deklaruar Kurti.
Ai shtoi se aktualisht Osmani ushtron funksionin e presidentes dhe për këtë arsye diskutimet politike publike rreth rolit të saj të mundshëm në parti nuk janë të përshtatshme në këtë moment.
Kurti theksoi gjithashtu se nëse në të ardhmen Osmani vendos të rikthehet në politikë aktive partiake, atëherë situata do të jetë ndryshe dhe mund të hapen diskutime të tjera politike.
“Nëse një ditë, siç është paralajmëruar, ajo mund të kthehet në politikë, atëherë është situatë tjetër”, u shpreh Kurti.
Deklarata e tij vjen në një kohë kur në skenën politike në Kosovë po diskutohen skenarë të ndryshëm rreth zhvillimeve të ardhshme politike dhe rolit që mund të kenë figurat kryesore institucionale pas përfundimit të mandateve të tyre.
