Në qëllim të mbrojtjes së trashëgimisë kulturore dhe sigurisë së qytetarëve, Ministria e Kulturës dhe Turizmit ka njoftuar se monumenti Kalaja e Prizrenit do të mbyllet përkohësisht në disa prej zonave të saj.
Vendimi është marrë pas vlerësimeve profesionale që tregojnë gjendje të rënduar të disa strukturave dhe rrezik potencial për vizitorët.
Zonat me rrezik do të jenë të shënuara dhe të kufizuara deri në një njoftim të radhës.
Gjithashtu, është pezulluar dhënia në shfrytëzim e hapësirave të kalasë për aktivitete nga organizata, iniciativa kulturore dhe artistë të pavarur, deri në stabilizimin e gjendjes dhe krijimin e kushteve të sigurta.
Publiku do të njoftohet me kohë për çdo zhvillim të mëtejmë dhe për afatet e mundshme të rihapjes.
Ky vendim është në shërbim të ruajtjes së një prej monumenteve më të rëndësishme të trashëgimisë sonë dhe të sigurisë së vizitorëve.
