Një incident i rëndë është shënuar në São Paulo, ku një konflikt i nisur gjatë një koncerti muzikor ka përfunduar me të shtëna me armë dhe plagosje.
Sipas raportimeve të mediave braziliane, gjithçka nisi gjatë një koncerti të muzikës country, ku një debat verbal mes 29-vjeçares Giovanna Abdalla dhe një biznesmeni lokal, Rafael Araldi Moreira, degjeneroi në përplasje më të ashpër. Pas shkëmbimit të fyerjeve, Abdalla së bashku me bashkëshortin e saj, Marcelo Rossato, vendosën të shkojnë në banesën e biznesmenit për t’u përballur drejtpërdrejt me të.
Ngjarja mori një kthesë të rrezikshme kur 29-vjeçarja, sapo zbriti nga automjeti, nisi të godiste pronën e Moreira-s me rrip, në shenjë revolte. Megjithatë, situata eskaloi shpejt, pasi biznesmeni reagoi duke përdorur armë zjarri.
Si pasojë e të shtënave, gruaja u plagos, duke marrë një goditje në pjesën e pasme të trupit. Pamjet e kamerave të sigurisë, të publikuara nga mediat lokale, tregojnë momentin kur çifti përpiqet të largohet me shpejtësi nga vendi i ngjarjes, ndërsa dëgjohen të shtënat.
Në video shihet se Abdalla, e plagosur, përkulet nga dhimbja duke mbajtur plagën, ndërsa bashkë me bashkëshortin hipin në automjet dhe largohen me urgjencë drejt spitalit për të marrë ndihmën mjekësore.
Autoritetet braziliane kanë nisur hetimet për zbardhjen e plotë të rrethanave të incidentit, ndërsa pritet të përcaktohen përgjegjësitë ligjore të të përfshirëve në këtë përplasje që për pak sa nuk përfundoi me pasoja edhe më të rënda.
