Shefja e Grupit Parlamentar të Lëvizja Vetëvendosje, Arbërie Nagavci, ka reaguar ndaj deklaratës së zyrës së Vjosa Osmani lidhur me çështjen e nënshkrimeve për kandidaturën për presidente.
Nagavci nuk dha një përgjigje të drejtpërdrejtë për polemikën, por tha shkurt se është e gatshme të garantojë nënshkrimet e nevojshme për vazhdimin e garës për presidencën.
“Zonjës Learta dhe zonjës presidente, unë sot i garantoj nënshkrimet për të vazhduar në garë”, deklaroi ajo.
Më herët, shefja e kabinetit të presidentes, Learta Hollaj, kishte mohuar se presidentes i janë ofruar nënshkrimet nga Vetëvendosje për një kandidaturë të mundshme për rizgjedhje.
“Kjo është gënjeshtër”, shkroi Hollaj në një reagim publik në Facebook.
Nga ana tjetër, Nagavci ka theksuar se Vetëvendosje ka qenë e gatshme t’i ofrojë Osmanit nënshkrimet e nevojshme për kandidaturën e saj, por sipas saj, presidentja aktuale nuk e ka pranuar këtë ofertë.
Ajo shtoi se, duke marrë parasysh afatet dhe dinamikat për zgjedhjen e presidentes, Vetëvendosje mbetet e hapur që të ofrojë nënshkrimet edhe për kandidatë të tjerë potencialë që mund të propozohen nga subjektet politike.
