Instituti Demokratik i Kosovës (KDI) ka vlerësuar miratimin në parim të Projektligjit për Byronë Shtetërore për Verifikimin dhe Konfiskimin e Pasurisë së Pajustifikueshme si një zhvillim të rëndësishëm në përpjekjet e vendit për forcimin e sundimit të ligjit dhe luftimin e korrupsionit. Sipas KDI-së, ky mekanizëm i ri ligjor mund të përbëjë një kthesë të rëndësishme në mënyrën se si trajtohet pasuria e pajustifikueshme në Kosovë, veçanërisht në një realitet ku konfiskimi përmes procedurave penale deri më tani ka rezultuar i kufizuar dhe jo gjithmonë efektiv.
Në vlerësimin e tij, KDI thekson se krijimi i një sistemi ku pasuria e pajustifikueshme mund të trajtohet edhe përmes procedurave civile hap një qasje më të gjerë dhe më funksionale në luftën kundër përfitimeve të paligjshme. Sipas institutit, një model i tillë, nëse ndërtohet mbi baza të forta ligjore dhe kushtetuese, mund të shërbejë si instrument thelbësor për rritjen e transparencës dhe rikthimin e besimit të qytetarëve në institucionet e drejtësisë dhe shtetit.
Megjithatë, KDI thekson se rëndësia e këtij projektligji nuk qëndron vetëm në miratimin e tij në parim, por në përmbajtjen përfundimtare që do të marrë gjatë shqyrtimit në Kuvend. Duke kujtuar se kjo nismë ka kaluar një proces të gjatë institucional, përfshirë edhe vlerësime nga Gjykata Kushtetuese dhe Komisioni i Venecias, KDI nënvizon se kjo fazë duhet të shfrytëzohet për adresimin e të gjitha rekomandimeve të dhëna më herët, në mënyrë që ligji përfundimtar të jetë i qartë, i zbatueshëm dhe në përputhje me standardet kushtetuese.
Sipas KDI-së, Kuvendi i Kosovës mban përgjegjësi të veçantë në këtë fazë për të siguruar një shqyrtim të mirëfilltë ligjvënës, ku debatet të jenë përmbajtësore dhe jo formale. Instituti thekson se është me rëndësi që çdo amendament i mundshëm të trajtohet me kujdes të veçantë, duke përfshirë edhe ekspertizën profesionale dhe konsultimet e hapura, në mënyrë që të shmangen paqartësitë ligjore që mund të pengojnë zbatimin e ligjit në praktikë.
Në qëndrimin e tij, KDI shpreh gatishmërinë për të kontribuar në këtë proces përmes ekspertizës dhe mbështetjes në organizimin e diskutimeve gjithëpërfshirëse, duke synuar që ligji të mos mbetet vetëm një akt formal, por të shndërrohet në një mekanizëm efektiv në luftën kundër korrupsionit. Po ashtu, institucioni u ka bërë thirrje partive politike që të zhvillojnë konsultime më të gjera me palët e prekura drejtpërdrejt nga ligji dhe me qytetarët, në mënyrë që të rritet kuptueshmëria dhe transparenca rreth përmbajtjes dhe ndikimit të tij në praktikë.
