Dënimi me burgim të përjetshëm ndaj dy personave për sulmin vdekjeprurës në Banjskë, dhe të tretit me burgim prej 30 vjetësh, ka zënë vend në mediat kryesore ndërkombëtare.
Agjencia franceze e lajmeve AFP, ka raportuar për burgimin e përjetshëm ndaj Vlladimir Tolliqit dhe Bllagoje Spasojeviq, dhe dënimin prej 30 vjetësh ndaj Dushan Maksimoviqit me titullin “Tre separatistë serbë dënohen me shumë vite burgim për sulm në Kosovë”.
Raportimin e AFP-së e kanë transmetuar edhe media tjera, ndër to edhe “Yahoo News”, me titullin “Separatistët serbë dënohen për sulmin vdekjeprurës në Kosovë”. “Një gjykatë në Kosovë u dha tre personave dënime të gjata me burg të premten për pjesëmarrje në një përpjekje të dështuar të armatosur për shkëputje nga separatistët serbë në veriun e vendit më 2023”. “Të akuzuar për terrorizëm, dy u dënuan me burgim të përjetshëm, ndërsa i treti u dënua me 30 vjet për pjesëmarrjen e tyre në një përleshje vdekjeprurëse midis dhjetëra burrave të armatosur rëndë, të udhëhequr nga serbi i Kosovës Millan Radoiçiq, dhe policisë së Kosovës në Banjskë, pranë kufirit me Serbinë”. “Një oficer policie i Kosovës dhe tre persona të armatosur serbë u vranë në shkëmbimin e zjarrit që zgjati disa orë, me grupin që u strehua brenda një manastiri përpara se të ikte nga policia në Serbi”, shkruan mes tjerash në artikullin e “Yahoo News”, që ai referohet shkrimit të AFP-së, transmeton Klankosova.tv.
Radoiçiq, sipas AFP-së, ish-nënkryetar i Listës Serbe – partia kryesore serbe e Kosovës – më parë i ka pranuar autoriteteve të Beogradit se ai e ka udhëhequr sulmin, por mbetet e paqartë nëse ai është nën hetim në Serbi.
Veç AFP-së, për gjykimin kanë raportuar edhe Reuters e AP, artikujt e të cilave i kanë shpërndarë edhe media tjera botërore, si “Washington Post”, “ABC News” dhe ajo franceze “Le Monde”, mes tjerave.
