Lëvizja Vetëvendosje po përgatitet të hyjë javën e ardhshme me një strategji të re për të zhbllokuar procesin e zgjedhjes së Presidentit të Kosovës. Partia në pushtet ka identifikuar tashmë dy kandidatë të rinj që kryeministri Albin Kurti pritet t’i propozojë gjatë takimeve me liderët e opozitës.
Emrat nuk do të bëhen publikë para takimeve, por do të diskutohen drejtpërdrejt në tryezën e bisedimeve, me synimin për të arritur një kompromis politik që të sigurojë shumicën e nevojshme në Kuvend për zgjedhjen e Presidentit. Nëse një nga partitë opozitare pranon njërin nga kandidatët e propozuar, ai emër do të dërgohet për votim në seancën e Kuvendit. Kjo gjithashtu nënkupton mundësinë e tërheqjes ose zëvendësimit të kandidatëve aktualë që po përfolen, si Glauk Konjufca dhe Fatmire Kollçaku, të cilët deri tani janë konsideruar opsione nga Vetëvendosje.
Njëri nga kandidatët e rinj pritet të jetë figura më konsensuale, e pranueshme edhe për opozitën, ndërsa kandidati tjetër mund të shërbejë më shumë për të përmbushur kriteret procedurale të procesit të zgjedhjes së Presidentit. Po ashtu, po shqyrtohet edhe mundësia që një nga partitë opozitare të propozojë vetë një kandidat, nëse arrihet dakordim paraprak politik.
Megjithatë, në rast se liderët opozitarë nuk pranojnë emrat e propozuar nga Kurti, Vetëvendosje mund të procedojë me kandidatët aktualë, Konjufca dhe Kollçaku, çka do të komplikonte arritjen e shumicës së nevojshme. Në këtë skenar, mungesa e zgjedhjes së Presidentit mund të shkaktojë një krizë institucionale, që potencialisht do të çonte në shpërndarjen e Kuvendit dhe organizimin e zgjedhjeve të reja.
Java e ardhshme pritet të jetë vendimtare për këtë proces, ndërsa të gjitha sytë janë drejtuar nga takimet mes Kurtit dhe liderëve opozitarë, të cilat mund të përcaktojnë drejtimin politik të vendit për muajt e ardhshëm.
