Deputetja e Lidhjes Demokratike të Kosovës, Hykmete Bajrami, ka denoncuar situatën shqetësuese me çmimet e naftës në vend, duke e cilësuar si absurde dhe jashtë çdo logjike tregu. Sipas saj, rritja e çmimeve ndodh menjëherë pas lajmeve ndërkombëtare, siç ishte raportimi për mbylljen e ngushticës së Hormuzit, por kur situata qetësohet dhe çmimet në bursat ndërkombëtare bien, nafta në Kosovë nuk zbret. Kjo, sipas Bajramit, tregon qartë se qytetarët po abuzohen dhe se Qeveria po shfrytëzon krizën për të mbushur buxhetin.
“Është absurde ajo që po ndodh me çmimet e naftës. Çmimi rritet sapo del një lajm, por nuk zbret edhe kur tregu ndërkombëtar qetësohet. Ky nuk është logjikë tregu, është abuzim që po bëhet ndaj qytetarëve nga naftarët dhe Qeveria, e cila po e shfrytëzon krizën për të mbushur buxhetin,” tha Bajrami. Ajo thekson se problemet me çmimet nuk mund të zgjidhen thjesht me caktimin e marzhave apo çmimeve tavan, por kërkojnë masa më të thella dhe më të qëndrueshme.
Deputetja kritikoi mungesën e transparencës dhe të dhënave reale nga ana e Ministrisë së Industrisë, Ndërmarrësisë, Tregtisë dhe Inovacionit (MINT), duke vënë në dukje se qeveria nuk ka informacion bazik për sasinë e naftës në treg dhe çmimet reale të importit. “Sot nuk ka të dhëna bazike: sa është sasia e naftës në treg kur rriten çmimet, sa litra janë importuar me çmime më të ulëta dhe a po shiten me çmime më të larta? Ky informacion ekziston në Doganë, por nuk përdoret nga MINT, duke treguar se vendimmarrja nuk bazohet në të dhëna reale, por në reagime të vonuara dhe selektive,” shtoi Bajrami.
Ajo theksoi se çdo litër naftë sot sjell të ardhura shtesë për qeverinë, duke e quajtur këtë një “haraç” në emër të krizës, pasi qytetarët paguajnë më shumë sesa çmimet në tregjet ndërkombëtare. Sipas Bajramit, kontrolli i marzhave nga qeveria dhe refuzimi për të ulur TVSH-në dhe akcizën janë thelbësore në këtë situatë, pasi për çdo litër nafte qeveria mbledh 13–15 cent më shumë se para krizës, duke e kthyer krizën në fitim për buxhetin shtetëror.
Për të ndaluar këtë abuzim, Bajrami propozon urgjentisht një sistem raportimi ditor për stoqet dhe çmimet e importit të naftës, detyrimin që çmimet në treg të reflektojnë në kohë reale dhe rishikimin e taksave kryesore. Sipas saj, stabilizimi i çmimit të naftës është një nga masat më efektive për të luftuar inflacionin dhe për të mbrojtur qytetarët nga shpenzimet e tepruara.
Deputetja përfundon me një paralajmërim të fortë: problemi nuk është mungesa e mekanizmave, por mungesa e vullnetit politik. Qeveria, sipas saj, ka në fokus rritjen e buxhetit dhe jo qytetarin, duke përdorur krizën për të mbledhur më shumë të ardhura që më vonë do të shfrytëzohen për interesa elektorale. “Nafta është produkt që shkakton inflacion; çdo ndihmë që Qeveria ofron pas inflacionit vetëm e ushqen atë. Stabilizimi i çmimeve duhet të jetë prioritet kombëtar dhe masë për të mbrojtur qytetarët,” përfundoi Bajrami, duke lënë mesazh të qartë se qytetarët nuk mund të vazhdojnë të jenë pre e politikave që e shndërrojnë krizën në fitim për qeverinë.
