Albin Kurti ka komentuar zhvillimet e fundit politike lidhur me dështimin e arritjes së një marrëveshjeje mes partive parlamentare për zgjedhjen e presidentit të ri të vendit, pas refuzimit të ofertave të tij nga opozita.
Duke folur për situatën e krijuar, Kurti tha se ka qenë “shumë gjeneroz” në ofertat e bëra ndaj Partia Demokratike e Kosovës dhe Lidhja Demokratike e Kosovës, duke synuar arritjen e një kompromisi institucional që do të mundësonte zgjedhjen e presidentit dhe shmangien e zgjedhjeve të parakohshme.
Sipas tij, problemi qëndron te mungesa e vullnetit politik të këtyre partive, të cilat, pavarësisht numrit të kufizuar të deputetëve, kanë refuzuar propozimet e tij. Kurti u shpreh i habitur me këtë qëndrim, duke theksuar se ofertat e bëra nga ana e tij kanë qenë të arsyeshme dhe të hapura për bashkëpunim.
“Çka të bëjmë me rezultatin që më ka dhënë 51 përqind. Ata nuk i kanë votat as për t’i mbledhur nënshkrimet për një kandidat. Si mund t’ua jap unë kur nuk ia ka dhënë populli? Unë jam super gjeneroz. Duhet t’i pyesni ata si është e mundur që me këta numra të ulët i bëjnë këto refuzime gjeneroze”, ka deklaruar Kurti, duke iu referuar rezultatit zgjedhor dhe balancave aktuale në Kuvend.
Deklaratat e tij vijnë në një moment kur situata politike në Kosovë është tensionuar ndjeshëm, pas dështimit të disa raundeve negociatash për të arritur një marrëveshje mbi emrin e presidentit. Mungesa e konsensusit mes partive kryesore ka shtuar mundësinë e shkuarjes në zgjedhje të reja parlamentare.
Nga ana tjetër, opozita ka kritikuar qasjen e kryeministrit, duke e cilësuar atë si mungesë fleksibiliteti dhe përpjekje për të imponuar zgjidhje politike. Sipas tyre, një marrëveshje për presidentin kërkon kompromis të vërtetë dhe jo oferta të njëanshme.
Në këtë klimë të tensionuar politike, mbetet e paqartë nëse do të arrihet ndonjë marrëveshje brenda afateve kushtetuese, apo nëse vendi do të shkojë drejt zgjedhjeve të reja parlamentare, të cilat do të ndryshonin sërish ekuilibrat politikë në vend.
