Presidenti i Real Madridit, Florentino Pérez, në një konferencë për media urgjente ka surprizuar botën e futbollit të martën duke shpallur mbajtjen e zgjedhjeve të reja në klub, ku konfirmoi se synon të kërkojë një tjetër mandat.
Ndonëse koha e konferencës nxiti spekulime të shumta për një dorëheqje të mundshme, 79-vjeçari e nisi fjalimin e tij në mënyrë të prerë: “Më vjen keq t’ju them se nuk do të jap dorëheqje”.
Pérez, i cili udhëheq klubin që nga viti 2009 (pasi shërbeu edhe në periudhën 2000-2006), i bëri thirrje çdo rivali të mundshëm që të dalë hapur në garë.
“Kushdo që dëshiron të kandidojë kundër meje, mund ta bëjë. Unë do të kandidoj për të mbrojtur të drejtat e anëtarëve tanë (socios). Por, mos lëvizni në hije,” deklaroi ai, duke i kërkuar bordit elektoral nisjen e menjëhershme të procedurave.
Pérez është zgjedhur pa asnjë kundërshtar në katër proceset e fundit (2013, 2017, 2021 dhe 2025), andaj kjo lëvizje shihet si një sfidë e hapur për të rikonfirmuar pushtetin e tij në “Santiago Bernabéu”.
