Instituti Demokratik i Kosovës (KDI) organizoi një tryezë diskutimi me temën ‘Forcimi i integritetit politik përmes digjitalizimit’, ku u prezantuan zbulimet kryesore mbi sfidat ligjore, institucionale dhe digjitale që ndikojnë në integritetin politik në Kosovë.
Diskutimi mblodhi përfaqësues të institucioneve të ndryshme, si deputetë të Kuvendit të Kosovës, Agjencia për Parandalimin e Korrupsionit, Komisioni Rregullativ i Prokurimit Publik, Komisioni Qendror i Zgjedhjeve, OGP Kosova, shoqëria civile dhe përfaqësues të organizatave ndërkombëtare në Kosovë për të adresuar çështjet e deklarimit të pasurisë, financimit politik dhe prokurimit publik si elementet kryesore të integritetit politik.
Në prezantimin e saj, Diana Metushi-Krasniqi nga KDI theksoi se, megjithëse ka pasur përparim në transparencë, ekosistemi i të dhënave për integritetin politik vazhdon të jetë i shpërndarë dhe jo mjaftueshëm i përshtatshëm me standardet e të dhënave të hapura dhe të përpunueshme, duke e bërë të vështirë llogaridhënien efektive të zyrtarëve publikë.
Analiza e KDI-së tregon se, edhe pse Kosova ka një kornizë ligjore të avancuar në fushat kyçe të integritetit politik, zbatimi është ende i dobët dhe të dhënat publike janë të fragmentuara dhe të pa standardizuara.
Gjetjet kryesore tregojnë se ka rreziqe reale të korrupsionit në sektorin publik.
KDI thekson se sistemi aktual ofron transparencë formale, por jo llogaridhënie reale për shkak të mungesës së përdorimit aktiv të të dhënave për analizë dhe vendimmarrje.
