Shkrimtari, poeti dhe përkthyesi shqiptar Arben Idrizi është nominuar për çmimin evropian të letërsisë “European Union Prize for Literature” (EUPL), duke u renditur në mesin e 14 autorëve të përzgjedhur këtë vit për një nga çmimet më të rëndësishme në fushën e letërsisë bashkëkohore evropiane. Ky çmim ka si qëllim promovimin e zërave të rinj dhe forcimin e bashkëpunimit kulturor mes vendeve të Bashkimit Evropian.
Në garë për këtë çmim me traditë, i cili u nda për herë të parë në vitin 2009, Idrizi është përfshirë me veprën e tij prozaike “Njeriu që habitej dhe tregime të tjera”, e cila ka tërhequr vëmendjen e kritikëve për trajtimin e dhunës, traumës dhe habisë si kushte ekzistenciale të jetës njerëzore përballë historisë.
Sipas përshkrimit në faqen zyrtare të çmimit, libri tregon historinë e Isak Kodrës, një të mbijetuar të një masakre lufte, i cili, pas përjetimit të të paimagjinueshmes, mbetet i ngrirë në një gjendje të përhershme habie. Përmes një serie tregimesh të lidhura tematikisht, Idrizi ndërton një univers të errët, ku dhuna nuk shihet vetëm si ngjarje, por si mënyrë e të menduarit, e të kujtuarit dhe e të ekzistuarit.
Stili i autorit lëviz me finesë nga realiteti historik konkret drejt dimensioneve alegorike dhe metafizike, duke trajtuar luftën, pushtimin, dëbimin dhe absurditetin e historisë si përvoja që formësojnë identitetin individual dhe kolektiv. Tregimet e tij janë të pasura me reflektime filozofike dhe emocionalitet të thellë, duke ofruar një pasqyrë të jashtëzakonshme mbi natyrën njerëzore dhe pasojat e konfliktit.
Arben Idrizi, i lindur në vitin 1974, ka një krijimtari të pasur me njëmbëdhjetë libra – dhjetë përmbledhje poetike dhe një vëllim me tregime të shkurtra. Përveç veprave origjinale, ai ka përkthyer në shqip disa prej autorëve më të njohur evropianë, duke përfshirë Valerio Magrelli, Tino Caspanello, Roberto Calasso, Giacomo Leopardi dhe Cesare Pavese, duke kontribuar kështu në pasurimin e letërsisë shqipe me perspektiva të reja dhe ndikime ndërkombëtare.
Nomimi i Idrizit për EUPL jo vetëm që vlerëson veprën e tij të fundit, por edhe vendos emrin e tij ndër autorët më të dalluar bashkëkohorë shqiptarë në skenën letrare evropiane.
