Trajneri i Kombëtarja e Shqipërisë në futboll, Sylvinho, po përforcon repartin e mbrojtjes në prag të sfidës play-off për Kupën e Botës 2026. Kuqezinjtë do të përballen me Polonia më 26 mars në Varshavë, në një duel vendimtar që do të përcaktojë nëse Shqipëria do të sigurojë një vend në finalen e play-off-it ndaj fituesit të çiftit Ukraina – Suedia, apo do ta mbyllë këtu rrugëtimin drejt “ëndrrës amerikane”.
Në funksion të kësaj përballjeje të rëndësishme, Sylvinho dhe stafi i tij teknik kanë nisur prej javësh përgatitjet intensive, duke zhvilluar takime individuale me disa prej futbollistëve kryesorë të ekipit, si kapiteni Berat Gjimshiti dhe mbrojtësi me përvojë Elseid Hysaj. Fokusi ka qenë te organizimi defensiv dhe rritja e sigurisë në prapavijë, përballë një kundërshtari fizikisht të fortë si Polonia.
Megjithatë, trajneri brazilian duket se nuk do të mbështetet vetëm te emrat aktualë. Burime pranë ekipit bëjnë të ditur se dy afrime të reja pritet t’i bashkohen kuqezinjve, pikërisht në repartin e mbrojtjes. Bëhet fjalë për mbrojtësin e AEK Athinë, Stavros Pilios, si dhe për lojtarin e Lechia Gdańsk, Bujar Pllana.
Pilios, 25 vjeç, prej muajsh përflitet si një opsion serioz për krahun e majtë të mbrojtjes. Ai ka zhvilluar një sezon pozitiv në Greqi, ku ka regjistruar rreth 30 paraqitje dhe ka kontribuar me katër asistime, duke treguar qëndrueshmëri dhe aftësi në fazën sulmuese. Profili i tij shihet si i përshtatshëm për skemën dinamike të Sylvinhos.
Ndërkohë, Bujar Pllana, mbrojtës qendror që mund të aktivizohet edhe në krahun e djathtë, ka përfituar së fundmi pasaportën shqiptare. Që nga vera e vitit 2024 ai aktivizohet në Poloni me Lechia Gdańsk, çka i jep një avantazh shtesë në njohjen e futbollit polak përpara sfidës në Varshavë. Pllana ka qenë pjesë e përfaqësueses U-21 të Kosovës në tri ndeshje, por më pas nuk u ftua më nga “Dardanët”, duke hapur rrugën për një angazhim të ri me Shqipërinë.
Me këto lëvizje, Sylvinho synon të shtojë konkurrencën dhe alternativat në mbrojtje, në një ndeshje ku çdo detaj mund të bëjë diferencën mes vazhdimit të ëndrrës për Botërorin 2026 dhe eliminimit.
