11 ditë pas zhdukjes së Eglant Koçit: Hetimet përshkojnë Tiranën dhe Elbasanin në kërkim të gjurmëve

11 ditë nga zhdukja e Eglant Koçit, policia e Tiranës ende nuk ka asnjë gjurmë të tij.

Pas analizimit të provave të siguruara për rastin, hetuesve u është krijuar bindja se 34-vjeçari është vrarë nga shoku i tij, Armando Shakaj, në ambientet e brendshme të një zyre në Bulevardin “Zhan D’Ark”.

Trupi dyshohet se është transportuar me këtë makinë jashtë Tiranës, por vendndodhja e tij mbetet ende enigmë.

Sipas Top Channel, prej disa ditësh, policia po kontrollon në zonën e Dajtit dhe në fshatrat malorë të Elbasanit, së bashku me një ekip nga Kosova, të pajisur me qen të trajnuar për këto kërkime, por deri tani pa rezultat.

Pas sekuestrimit të makinës, e cila dyshohet se është nxjerrë nga kryeqyteti me karrotrec, policia zbuloi se mjetit i ishte hequr GPS-ja.

Për të vijuar kërkimet, policia është orientuar te pasioni që autori i dyshuar kishte për garat “rally” në terrene off-road.

Aktualisht, kërkimet janë përqendruar në lokacionet mes Tiranës dhe Elbasanit që autori i dyshuar ka vizituar.

Paralelisht me këto kërkime, policia po punon edhe për arrestimin e Armando Shakajt.