Kandidati për deputet nga radhët e LDK-së Avdullah Hoti, ka ngritur alarmin për rritjen e kostove të prodhimit në vend, duke paralajmëruar pasoja serioze për ekonominë dhe konkurrueshmërinë e prodhuesve vendorë.
Në një reagim publik, Hoti iu referua të dhënave të ASK-së, sipas të cilave çmimet e prodhimit në tremujorin e parë të vitit 2026 janë rritur për 7.9 për qind krahasuar me të njëjtën periudhë të vitit 2025, ndërsa krahasuar me vitin 2021, rritja e kostove të prodhimit ka arritur në 24.1 për qind.
Sipas tij, rritja e kostove është shkaktuar kryesisht nga shtrenjtimi i energjisë dhe mungesa e politikave zhvillimore që do të mbështesnin sektorin prodhues.
Ai ka theksuar se rritja e importeve tashmë është bërë evidente në ekonominë e vendit.
Ish-kryeministri, ka paralajmëruar se Kosova rrezikon të futet në një “kurth të zhvillimit të ulët”, nëse nuk ndryshohet qasja ekonomike dhe fiskale ndaj sektorit privat.
Ai ka propozuar gjithashtu bashkëpunim më të ngushtë me sistemin bankar për të krijuar instrumente kreditore më të favorshme për prodhuesit vendorë.
Në fund të reagimit të tij, ai u ka bërë thirrje qytetarëve që në zgjedhjet e 7 qershorit të mbështesin një qeveri që, sipas tij, fokusohet në zhvillim ekonomik dhe hapje të vendeve të punës.
