Kryetari i Partisë Demokratike, Sali Berisha, sot në një konferencë për mediat në 7 prill ka rikthyer vëmendjen mbi krizën e thellë të çmimeve të naftës, duke akuzuar qeverinë se nuk ka ndërmarrë asnjë masë efektive për të lehtësuar barrën fiskale mbi qytetarët. Ai ka theksuar se ulja urgjente e taksave mbi karburantet është e domosdoshme, duke shprehur shqetësimin se Shqipëria mbetet një nga vendet me ngarkesën më të lartë fiskale mbi litrin e naftës në botë. Berisha ka saktësuar se krahasimisht me vendet fqinje si Maqedonia e Kosova, ku taksat janë pothuajse 50 përqind më të ulëta, qytetarët shqiptarë paguajnë një barrë shumë të rëndë, ndërkohë që çdo manovër tjetër e qeverisë është thjesht inefikase dhe favorizon arkën e shtetit.
Ai ka denoncuar se rritja e çmimit të naftës nga 170 në 220 lekë për litër ka prodhuar një grumbullim prej rreth 80 milionë eurosh në vit në xhepat e qeverisë, pa asnjë shpërndarje reale për qytetarët apo pensionistët. “Asnjë vend tjetër në botë nuk ka taksuar litrin e naftës 60 përqind të çmimit me të cilin shitet. Ky është niveli më i lartë në botë i taksave për litrin e naftës”, ka theksuar Berisha, duke kërkuar përgjysmim të menjëhershëm të kësaj barre fiskale për të lehtësuar pasojat e rritjes së çmimeve dhe për të amortizuar efektet mbi jetën e përditshme të shqiptarëve.
Në vijim, Berisha ka sulmuar qeverinë e Edi Rama për mënyrën se si ka trajtuar pensionistët nëpërmjet skemës së bonusit. Ai ka akuzuar se premtimet e bërë gjatë zgjedhjeve të vitit 2025 janë mashtrim i pastër, pasi mbi 240 milionë euro të depozituara në Bankën e Shtetit nuk janë shpërndarë dhe shfrytëzohen për qëllime të tjera. Ai ka theksuar se kjo skemë nuk ka përfshirë mbi 45 përqind të pensionistëve, ndërsa shumë të tjerëve u jepen vetëm “thërrime”, duke përmendur shembuj simbolikë si dy kile domate apo tre kile tranguj. Sipas tij, kjo tregon një qëndrim cinik dhe të pashpirt të qeverisë ndaj shtresës më të vulnerabël të shoqërisë, duke theksuar se rritja stratosferike e çmimeve e bën situatën edhe më të rëndë për pensionistët.
Berisha ka ftuar qytetarët që të dalin në protestë më 17 prill, duke e cilësuar këtë datë si momentin që do të shënojë tubimin më të fuqishëm kundër mazhorancës socialiste, të cilën e ka quajtur “regjim”. Ai ka theksuar se vetëm përmes mobilizimit qytetar mund të arrihet ulja e taksave dhe përmirësimi i gjendjes së pensionistëve, duke e paraqitur këtë tubim si një shans historik për të treguar forcën e popullit dhe për të kërkuar llogari nga qeveria për politikat e saj fiskale dhe shpërndarjen e fondeve publike. Në fjalimin e tij, Berisha ka insistuar se përgjysmimi i taksave mbi naftën dhe shpërndarja reale e fondeve të bonusit për pensionistët nuk janë vetëm kërkesa ekonomike, por një detyrim moral dhe një hap i domosdoshëm për drejtësinë sociale, ndërsa qytetarët duhet të ngrihen për të mbrojtur të drejtat e tyre përballë politikave që i penalizojnë ata më së shumti.
