Kryetari i AAK-së, Ramush Haradinaj, ka reaguar lidhur me gjendjen e lirisë së mediave në vend, duke shprehur shqetësimin se pushteti aktual po krijon klimë që mund të cenojë këtë të drejtë themelore demokratike.
Ai theksoi se, ndonëse numri i gazetave të shtypura ka rënë me kalimin e kohës, roli i medias mbetet i pazëvendësueshëm, sidomos në formatet digjitale. “Liria e shtypit nuk është privilegj i mediave, por është themel i demokracisë,” deklaroi Haradinaj, duke shtuar se media është “zëri që mban përgjegjës pushtetin dhe pasqyra që i tregon shoqërisë të vërtetën”, tha kreu i AAK-së.
Haradinaj vuri në dukje se respekti ndaj gazetarëve nuk duhet të varet nga përmbajtja e raportimeve të tyre. “Gazetari nuk është kundërshtar, por partner në ndërtimin e një shoqërie transparente”, tha ai.
Tutje, ai vlerësoi punën e gazetarëve, kameramanëve dhe ekipeve teknike, duke theksuar sakrificat dhe përkushtimin e tyre në kushte shpesh të vështira. “Pas çdo lajmi që lexojmë, qëndron një ekip njerëzish me përgjegjësi të madhe”.
Duke kritikuar diskursin aktual politik, Haradinaj tha se nga nivelet më të larta të pushtetit shpesh përdoret gjuhë fyese ndaj mediave.
Sipas tij, kjo qasje dëmton demokracinë dhe besimin e qytetarëve. “Kritika ndaj mediave është e drejtë, por ajo duhet të jetë argumentuese, jo denigruese”, theksoi ai.
Kreu i AAK-së pati edhe disa fjalë për kryeministrin në detyrë/dorëheqje, Albin Kurtin.
Ai shtoi se një kryeministër që sulmon median “sulmon një nga shtyllat kryesore të shtetit demokratik”, duke paralajmëruar për rrezikun e ndikimit negativ në lirinë e shprehjes.
Në fund, Haradinaj prezantoi qasjen e tij ndaj mediave, duke premtuar transparencë dhe bashkëpunim. “Nuk do të ketë mbyllje dyersh dhe as shmangie nga pyetjet”, deklaroi ai, duke shtuar se përgjegjësia e politikës është të japë përgjigje dhe jo të zgjedhë pyetjet. “Një shoqëri pa media të lirë është një shoqëri pa zë”, përfundoi Haradinaj, duke theksuar se beson në një Kosovë ku e vërteta nuk heshtet.
