Tragjedi në fshatin Gotham: Vajza 4-vjeçare humbet jetën pas goditjes nga një automjet në Angli

Një vajzë 4-vjeçare ka humbur jetën në spital, pasi u godit nga një automjet në fshatin Gotham, në qarkun Nottinghamshire të Anglisë.

Aksidenti ndodhi të dielën, pak para orës 14:30, në rrugën Nottingham Road.

Sipas Policisë së Nottinghamshire, e mitura u dërgua me urgjencë në spital, por ndërroi jetë pak kohë më vonë si pasojë e plagëve të marra.

Në lidhje me ngjarjen, policia arrestoi një 59-vjeçar, i dyshuar për shkaktim të vdekjes përmes drejtimit të rrezikshëm të automjetit.

Pas marrjes në pyetje, ai është liruar me kusht, ndërsa hetimet vijojnë.

Njësia e Hetimit të Aksidenteve Rrugore të Policisë së Nottinghamshire ka bërë thirrje për dëshmitarë që mund të kenë parë ngjarjen ose të disponojnë pamje nga kamerat e automjeteve (dashcam), të cilat mund të ndihmojnë në zbardhjen e plotë të rrethanave të aksidentit.

Rreshteri Paul Clark deklaroi: “Bëhet fjalë për një ngjarje thellësisht tragjike dhe mendimet tona janë me familjen dhe të afërmit e vajzës në këtë periudhë jashtëzakonisht të vështirë.”.

Ai u bëri thirrje qytetarëve të mos spekulojnë në rrjetet sociale mbi rrethanat e aksidentit dhe të respektojnë privatësinë e familjes, ndërsa hetimet janë ende në zhvillim.

Policia ka kërkuar që çdo person që ka informacion për incidentin të kontaktojë autoritetet, duke cituar referencën 424 të datës 12 korrik.