Dy persona janë gjetur pa shenja jete gjatë ditës së djeshme në dy raste të ndara, ka njoftuar Policia e Kosovës.
Rasti i parë ka ndodhur në Mitrovicë, ku një grua është gjetur pa shenja jete në banesën e saj.
Sipas raportit policor, viktima paraprakisht nuk ishte lajmëruar në telefon, ndërsa me asistencë të zjarrfikësve është hapur dera e banesës.
Ekipi mjekësor ka konstatuar se gruaja kishte vdekur. “Me urdhër të prokurorit, trupi i pajetë është dërguar në Institutin e Mjekësisë Ligjore (IML) për obduksion”, thotë PK.
Rasti i dytë është raportuar në fshatin Gracë të Vushtrrisë, ku familjarët kanë njoftuar se një person mashkull është gjetur pa shenja jete.
Në vendin e ngjarjes kanë dalë njësitë përkatëse policore dhe ekipi mjekësor, të cilët kanë konstatuar vdekjen e viktimës.
Edhe në këtë rast, me vendim të prokurorit, trupi i pajetë është dërguar në IML për obduksion.
You must be logged in to post a comment Login