Të paktën 12 persona kanë humbur jetën nga një zjarr i madh pyjor në zonën e Los Gallardos, në provincën juglindore të Almerías në Spanjë, njoftuan autoritetet rajonale të Andaluzisë.
Si pasojë e zjarrit, gjashtë persona të tjerë kanë mbetur të lënduar.
Disa prej viktimave u gjetën brenda automjeteve që ishin përfshirë nga flakët.
Dëshmitarët pretendojnë se zjarri mund të jetë shkaktuar nga rrëzimi i një linje të energjisë elektrike, duke u përhapur më pas me shpejtësi në një zonë pyjore aty pranë.
Megjithatë, autoritetet ende nuk e kanë konfirmuar zyrtarisht shkakun e zjarrit.
Evropa Jugore po përballet me një valë të vazhdueshme të nxehti, me temperatura që arrijnë rreth 40 gradë Celsius, duke nxitur shpërthimin e zjarreve të shumta pyjore.
Qindra zjarrfikës po luftojnë me vatrat e mëdha të zjarrit në Francë, Portugali dhe Spanjë, ndërsa mijëra banorë janë detyruar të evakuojnë shtëpitë e tyre.
Qeveria rajonale e Andaluzisë bëri të ditur se numri i viktimave në Los Gallardos është rritur në 12, pas konfirmimit të gjashtë vdekjeve të tjera.
Kreu i qeverisë rajonale, Juanma Moreno, e cilësoi ngjarjen si ‘një tragjedi’, duke shprehur dhimbjen e tij për humbjen e jetëve.
Rreth 150 zjarrfikës janë angazhuar për shuarjen e flakëve në fshatin Bedar.
Mes të lënduarve është një person që u dërgua në spital për shkak të thithjes së tymit dhe një tjetër që pësoi djegie.
Katër persona të tjerë morën ndihmë mjekësore në vendngjarje për djegie të lehta dhe probleme me frymëmarrjen të shkaktuara nga tymi i dendur.
Si pasojë e zjarrit janë mbyllur edhe disa rrugë, ndërsa rreth 1.000 banorë janë evakuuar, sipas shërbimeve të emergjencës.
You must be logged in to post a comment Login