Kabllo elektrike ka rënë në rrugë në Dedaj, Has – Situatë e rrezikshme për banorët

Banorët e fshatit Dedaj në Has të komunës së Prizrenit po përballen prej tre ditësh me një situatë të rrezikshme, pasi një kabllo elektrike ka rënë në rrugë dhe po paraqet rrezik për kalimtarët.

Banorët janë detyruar të improvizojnë masa për të shmangur kontaktin me kabllon, duke tentuar ta mbajnë larg sipërfaqes së rrugës për të parandaluar ndonjë incident të mundshëm.

Banorët e zonës kanë deklaruar se për problemin kanë njoftuar kompaninë KEDS, mirëpo ende nuk është ndërmarrë asnjë intervenim në terren.

Situata po ngjall shqetësim te qytetarët lokalë, të cilët kërkojnë reagim sa më të shpejtë për të shmangur rrezikun e mundshëm nga energjia elektrike në hapësira publike.

Zyrtarët e KEDS-it nuk kanë qenë të qasshëm për koment.